Aðalfundur Sáttar fór fram rafrænt þann 25. mars síðastliðinn og er hér meðfylgjandi fundargerð fundarins fyrir áhugasama.
Kosið var um tvö stjórnarsæti í stað Áslaugar Heiðu Gunnarsdóttur og Páls Ásgeirs Davíðssonar sem setið höfðu í stjórn frá árinu 2019. Tvö framboð bárust fyrir aðalfundinn og voru það þær Árdís Rut H. Einarsdóttir og Guðfinna Jóhanna Guðmundsdóttir sem voru kjörnar í stjórn.
Hér má sjá skjáskot af nýskipaðri stjórn í lok aðalfundarins. Á myndinni eru frá vinstra horninu: Árdís, Lilja, Guðfinna, Þóra Björg, Ingi, Kristín og Svavar.
Á aðalfundinum var kynnt tillaga vinnuhóps úr fagdeild Sáttar um endurmenntunarskilyrði fagdeildarinnar, en sú vinna var sett af stað með lagabreytingu á aðalfundi 2020. Tillagan var svo formlega samþykkt á stjórnarfundi þann 16. apríl 2021. Framvegis þurfa því þeir sem vilja vera á lista yfir vottaða sáttamiðlara hjá Sátt að skila inn upplýsingum um reynslu, þekkingaröflun eða aðra virkni á sviði sáttamiðlunar samkvæmt skilgreindu punktakerfi. Sáttamiðlari þarf að afla sér 15 punkta yfir þriggja ára tímabil til þess að viðhalda vottun sinni. Fyrirkomulag þetta og útfærsla verður nánar kynnt fyrir fagdeild félagsins.
Einnig var á fundinum samþykkt verklag fyrir kvartanir sem berast vegna meintra brota á siðareglum Sáttar, en ekki hafði verið til skjalfest ferli fyrir slík atvik.
Ný stjórn hefur þegar hafið störf og hlökkum við til að halda áfram að efla virkni sáttamiðlunar í íslensku samfélagi.